ဧရာဝတီ » သီလဝါ အထူးစီးပွားရေးဇုန် ၂၀၁၅ တွင် စတင်လည်ပတ်မည်

သီလဝါ အထူးစီးပွားရေးဇုန် ၂၀၁၅ တွင် စတင်လည်ပတ်မည်

Posted By Yeminnaing On January 10, 2013 @ 2:04 pm In စီးပွားရေး,၀_Investment | 1 Comment

ယမန်နေ့က ဆွေးနွေးပွဲတွင် ရှင်းလင်း ပြောကြားနေသော သီလ၀ါ အထူး စီးပွားရေးဇုန် ဖော်ဆောင်ရေး ကော်မတီ ဥက္ကဌ ဦးဆက်အောင်(ဓာတ်ပုံ – ဇွဲထက်/ဧရာဝတီ)

ရန်ကုန်တိုင်း ဒေသကြီး သံလျင်မြို့နယ်တွင် အကောင်အထည်ဖော်နေသော သီလဝါ အထူး စီးပွားရေးဇုန် စီမံကိန်းသည် လာမည့် ၂၀၁၅ ခုနှစ်တွင် လုပ်ငန်းများ စတင် လည်ပတ်နိုင်မည်ဖြစ်ကြောင်း သိရသည်။

ယမန်နေ့ နံနက်ပိုင်းက ပြည်ထောင်စုမြန်မာနိုင်ငံ ကုန်သည်များနှင့် စက်မှုလက်မှုလုပ်ငန်းရှင်များ အသင်းချုပ်(UMFCCI)တွင် ကျင်းပသည့် သီလဝါ စက်မှုဇုန် နှင့်ပတ်သက်သော ရှင်းလင်းဆွေးနွေးပွဲအပြီးတွင် အမျိုးသားစီမံကိန်းနှင့် စီးပွားရေးဖွံ့ဖြိုး တိုးတက်မှု ဝန်ကြီးဌာန ဒုတိယ ဝန်ကြီး ဦးဆက်အောင်က စက်မှုဇုန်လုပ်ငန်းများ ၂၀၁၅ ခုနှစ်တွင် စတင်လည်ပတ်နိုင်မည်ဟု ဧရာဝတီသို့ပြောကြားသည်။

“၂၀၁၅ မှာ စတင်လည်ပတ်နိုင်မယ်၊ အခုချိန်ကတည်းက နိုင်ငံပေါင်းစုံက ရင်းနှီးမြှုပ်နှံမှုတွေလုပ်နေပြီ၊ အထူးစီးပွား ရေးဇုန်အတွက် Master plan(လုပ်ငန်းစီမံချက်)ကိုတော့ မြန်မာနိုင်ငံမှာ တခါမှမရှိသေးတဲ့ပုံစံမျိုး ဆွဲနေတယ်၊ အကုန်လုံးတော့ စနစ်ကျအောင် လုပ် သွားမယ်”ဟု ဝန်ကြီး ဦးဆက်အောင်က ပြောသည်။

အဆိုပါ စီမံကိန်းတည်ဆောက်ရေးတွင် ဂျပန်နိုင်ငံကရင်းနှီးမြှုပ်နှံသူအဖြစ် မြန်မာနိုင်ငံနှင့် ဖက်စပ်လုပ်ကိုင်ပြီး ဂျပန်ကုမ္ပဏီကြီးများဖြစ်သည့် Sumitomo ၊ Mitsubishi ၊ Marobuni ကုမ္ပဏီများနှင့် ဂျပန်အစိုးရအဖွဲ့အစည်းများ ပါဝင်မည်ဖြစ်ကြောင်း၊ ဂျပန်နိုင်ငံ အနေဖြင့် ရင်းနှီးမြှုပ်နှံမှု ၄၉ ရာခိုင်နှုန်း ပါဝင်ခွင့်ရရှိမည်ဖြစ်ပြီး မြန်မာနိုင်ငံမှ ၅၁ ရာခိုင်နှုန်းရင်းနှီးမြှုပ်နှံရန် မြန်မာ-ဂျပန် သဘော တူ ညီချက် ရယူထားကြောင်း သိရသည်။ ယင်းစီမံကိန်း မြေဧရိယာ အကျယ်အ၀န်းသည် ဟက်တာ ၂၄၀၀ ရှိကြောင်း သီလ၀ါ အထူး စီးပွားရေးဇုန် ဖော်ဆောင်ရေး ကော်မတီ ဥက္ကဌ ၀န်ကြီး ဦးဆက်အောင်က ပြောသည်။

“ဂျပန်နိုင်ငံဘက်က မြန်မာအစိုးရကိုလည်း ပါဝင်စေချင်တဲ့ ဆန္ဒရှိတယ်ဆိုပေမယ့် အကြောင်းပြန်ထားတာတော့ မရှိသေးဘူး၊ သူတို့ က အစိုးရပိုင်းပါဝင်မှ ရင်းနှီးမြှုပ်နှံမှုတွေလုပ်ဖို့ ယုံကြည်မှုတွေရှိလာမယ်လို့ ပြောထားတယ်”ဟု ၎င်းက ဆိုသည်။

မြန်မာလုပ်ငန်းရှင်များကို ရင်းနှီးမြှုပ်နှံခွင့် ပေးရန်အတွက် အများပိုင်ကုမ္ပဏီကြီး တည်ထောင်သွားပြီး ရှယ်ယာများ ရောင်းချ၍ ပြည်တွင်း၊ ပြည်ပ မခွဲခြားဘဲ လုပ်ငန်းရှင်များ ရင်းနှီးမြှုပ်နှံခွင့်ကို တပြေးညီ လုပ်ကိုင် ခွင့်ပြုမည်ဟု သိရသည်။

“ပိုက်ဆံမရှိလို့ မလုပ်နိုင်တာမျိုးမဖြစ်အောင် ဂျပန်ဘက်က ချေးငွေဆောင်ရွက်ပေးမှာကြောင့် မလုပ်နိုင်စရာအကြောင်း လုံးဝမရှိဘူး၊ မြန်မာနိုင်ငံမှာလုပ်တဲ့စီမံကိန်းကို မြန်မာနိုင်ငံသားတွေအများဆုံး ပါနိုင်ဖို့ စဉ်းစားထားတယ်”ဟု ဦးဆက်အောင်က ပြောသည်။

ဆွေးနွေးပွဲ၌ UMFCCI ဥက္ကဌ ဦးဝင်းအောင်က “ထိရောက်မှု ရှိနိုင်မယ့် အဖွဲ့အစည်းတွေနဲ့ ဆောင်ရွက်မယ်၊ လုပ်သားကိစ္စတွေ အပါအဝင် အားလုံးကို အကျိုးရှိအောင် လုပ်သွားမှာပါ”ဟု ပြောသည်။

သီလဝါ အထူးစီးပွားရေးဇုန် စီမံကိန်း မြေနေရာများကို ဝယ်ယူရန်အတွက် လုပ်ငန်းရှင်များက စဉ်းစားကြသော်လည်း နိုင်ငံတကာ တွင် အကောင်အထည်ဖော်နေသော စီးပွားရေးဇုန်လုပ်ငန်း မြေနေရာများထက် အဆမတန် ဈေးမြင့်နေခြင်းကြောင့် သင့်လျော်သည့် နှုန်းထားဖြင့် လုပ်ကိုင်သွားနိုင်ရန် ညှိနှိုင်းနေကြောင်းလည်း သိရသည်။

ဆက်လက်၍ ဦးဆက်အောင်က“နိုင်ငံတကာမှာ ဖြစ်နေတဲ့ ဈေးထက် များနေတာကြောင့် အဲ့ဒီဈေးနဲ့တော့မသွားဘူး၊ သင့်တော်တဲ့နှုန်းနဲ့ပဲ သွားမယ်၊ လုပ်ငန်းရှင်တွေအရှုံးပေါ်အောင်တော့ လုပ်လို့မရဘူး”ဟု ပြောသည်။

သီလဝါဇုန်အတွင်းရှိ မြန်မာ အပြည်ပြည်ဆိုင်ရာ သီလဝါ ဆိပ်ကမ်း (MITT)တွင် ၁၆ နှစ်ကျော် အလုပ်လုပ်ကိုင်ခဲ့သည့် အငြိမ်းစား အရာရှိတဦးကလည်း“အထူး စီးပွားရေးဇုန် လုပ်မယ်ဆိုရင်တော့ လမ်းတွေကောင်းဖို့ လိုတယ်၊ ရေ လိုအပ်ချက်တွေလည်း ရှိတယ်၊ လျှပ် စစ်မီး ရရှိဖို့လည်း လိုတယ်၊ သီလဝါမှာက အဲ့ဒီလိုအပ်ချက် တွေအများကြီး ရှိနေတယ်”ဟု ပြောပြသည်။

လက်ရှိအခြေအနေအရ အလုပ်သမား ပြဿနာများ ရှိနေ၍ ဖြေရှင်းနိုင်ရန် လိုအပ်ကြောင်း၊ ထိုအခြေအနေများကြောင့် လုပ်ငန်းရှင် များ အနေဖြင့် စက်ရုံတည်ဆောက်အရေးအတွက် စဉ်းစားနေကြရကြောင်း ဆွေးနွေးပွဲ တက်ရောက်လာသည့် ကုမ္ပဏီ လုပ်ငန်းရှင် တဦးဖြစ်သူ ဦးကျော်လင်း က ပြောဆိုသည်။

သီလဝါ အထူးစီးပွားရေးဇုန် စီမံကိန်းအတွက် Master plan ကို လာမည့် ဒီဇင်ဘာ လကုန် အပြီးရေးဆွဲမည်ဖြစ်ပြီး နိုင်ငံတကာမှ ဥပဒေ ရေးရာ ကျွမ်းကျင်သူများ၊ အဖွဲ့အစည်းများနှင့် ညှိနှိုင်းနေကြောင်း၊ သဘာဝ ဘေးအန္တရာယ် ကာကွယ်ရေးအတွက် ကော် မတီများ ဖွဲ့စည်းနိုင်ရန် စီစဉ်နေကြောင်းလည်း သိရသည်။

Article printed from ဧရာဝတီ: http://burma.irrawaddy.org

URL to article: http://burma.irrawaddy.org/archives/30361

Click here to print.