အားကစား

ဝဲလ်ဘက်၊ ရော်နယ်ဒိုတို့ရဲ့ ဂိုးတွေနဲ့ ရီးယဲလ် – မန်ယူ သရေကျ

Hits:34,535
  | |
Print This Post

မန်ယူအသင်းမှ ၀ဲလ်ဘက် အဖွင့်ဂိုး သွင်းယူစဉ် (ဓာတ်ပုံ – Reuters)

ဘောလုံးပရိသတ်တွေ စောင့်မျှော်နေတဲ့ ရီးယဲလ်မက်ဒရစ်နဲ့  မန်ယူအသင်းတို့ရဲ့ ပွဲစဉ်ကို  မနေ့ညက ယှဉ်ပြိုင် ကစားခဲ့ရာမှာ မန်ယူအသင်းက အဝေးကွင်းမှာ ၀ဲလ်ဘက်ရဲ့ ဂိုးနဲ့ ဦးဆောင်နိုင်ပေမယ့် မန်ယူကစားသမားဟောင်း ရော်နယ်ဒိုရဲ့ ချေပဂိုးနဲ့ ပထမအကျော့ ရှုံးထွက်ပွဲစဉ်မှာ သရေရလဒ်နဲ့ ပွဲဟာ ပြီးဆုံးခဲ့ပါတယ်။ မန်ယူအသင်းဟာ အဝေးကွင်း မှာ ၁ ဂိုး ရရှိသွားတာကြောင့် နောက်တဆင့် တက်နိုင်ရေးအတွက် မျှော်လင့်ချက် ပိုမိုတောက်ပလာသလို မန်ယူပရိသတ်တွေအတွက် ကျေနပ်စရာရ လဒ်တခု ရရှိခဲ့တယ်လို့ ဆိုနိုင်ပါတယ်။

မော်ရင်ညို ကိုင်တွယ်နေတဲ့ အိမ်ရှင် ရီးယဲလ်မက်ဒရစ် အသင်းမှာ (ဂိုး) ဒီယေဂိုလိုးပက်စ်၊ ဗာရိန်း၊ ရာမို့စ်၊ ကွန်ထရာအို၊ အာဘယ်လိုအာ၊ ခက်ဒီရာ၊ ရော်နယ်ဒို၊ အိုဇေးလ်၊ အလွန်ဆို၊ ဒီမာရီယား၊ ဘန်ဇီမာတို့ နဲ့ ပွဲထွက်လာခဲ့ပြီး အရန်မှာတော့ နာမည်ကြီး ကစားသမားတွေဖြစ်တဲ့ ကာကာ၊ အက်ဆီယန်၊ မော်ဒရစ်၊ ကာဗယ်ဟို၊ ပီပီတို့ ပါဝင်ခဲ့ကြပါတယ်။

နည်းပြဖာဂူဆန်ရဲ့ မန်ယူအသင်းမှာတော့ (ဂိုး) ဒီဂီယာ၊ ရာဖေးလ်၊ အီဗရာ၊ ဂျုန်းစ်၊ ဖာဒီနန်၊ အီဗန်၊ ကာရစ်၊ ကာဂါဝါ၊ ရွန်းနီ၊ ၀ဲယ်ဘက်၊ ဗန်ပါစီတို့နဲ့ ပွဲထွက်လာခဲ့ပြီး အရန်မှာတော့ ဂစ်၊ စမောလင်း၊ အန်ဒါဆင်နဲ့ ချီချာရီတို့ ပါဝင်ခဲ့ကြပါတယ်။

အသင်းကြီး ၂ သင်း ဖြစ်တာနဲ့အညီ ပွဲအစမှာတင် သူတင်ကိုယ်တင် ဂိုးရဖို့ ကြိုးစားခဲ့ပြီး မန်ယူနည်းပြ ဖာဂူဆန်ရဲ့ တိုက်စစ် အားသန်တဲ့ ကစားသမား ၄ ယောက်ကို ကွင်းလယ်အထိ လိုက်ဆင်း၊ လိုက်တက် ခိုင်းတဲ့ပုံစံဟာ အလုပ်ဖြစ်ခဲ့ပါတယ်။ အထူးသဖြင့် ဂျုန်းစ်နဲ့ ဝဲလ်ဘက်တို့ဟာ ဖာဂူဆန်ရဲ့ ၀ှက်ဖဲတွေဖြစ်ခဲ့ကြပြီး အတက်အဆင်း မြန်မြန်နဲ့ ရီးယဲလ်က တိုက်စစ်ကို ကွင်းလယ်မှာတင် ဖြတ်ဖို့ ကြိုးစားခဲ့ပါတယ်။

ရီးယဲလ်အသင်းကတော့ လူအင်အား တောင့်တာနဲ့အညီ ပွဲအစမှာ ကစားကွက်မိမိနဲ့ ထိုးဖောက် ကစားသော်လည်း ဂိုးပေါက်တွေ လွဲချော်နေခဲ့တာကြောင့် အခွင့်အရေးတွေ ဆုံးရှုံးခဲ့ရတယ်လို့ ဆိုနိုင်ပါတယ်။ မန်ယူအသင်းဟာ ပထမပိုင်း မိနစ် ၂၀ မှာ ထောင့်ကန်ဘောကနေတဆင့် ဂိုးရရှိသွားပြီး ၀ဲလ်ဘက်က ဂိုးသွင်းယူပေးခဲ့တာ ဖြစ်ပါတယ်။ ဒီရာသီမှာ ဂိုးမသွင်းနိုင်တာကြောင့် ဝေဖန်ခံနေရတဲ့ ၀ဲလ်ဘက် ဟာဒီပွဲမှာ အကောင်းဆုံး ကစားနိုင်ခဲ့တာကို တွေ့ ရပါတယ်။

သိပ်မကြာခင်မှာပဲ ဒီမာရီယား ဘယ်ဘက်ထောင့်ကနေ တင်ပေးလိုက်တဲ့ ဘောလုံးကို ရော်နယ်ဒိုက မန်ယူနောက်တန်းများ ကြားကနေ ကျော်ခုန်ပြီး ချေပဂိုး သွင်းယူခဲ့ပါတယ်။ အသင်းဟောင်းဖက်သို့ ချေပဂိုး သွင်းယူခဲ့တဲ့ ရော်နယ်ဒိုရဲ့ ဂိုးဟာ ၂၀၀၈ ခုနစ်တုန်းကချန်ပီယံလိဂ် ဖိုင်နယ်ပွဲစဉ်မှာ ချယ်ဆီးအသင်းဖက်သို့ သွင်းယူခဲ့တဲ့ ဂိုးနဲ့ အတော့်ကို ဆင်တူတာ တွေ့ ရပါတယ်။ ဒီဂိုးဟာ ရော်နယ်ဒိုအတွက် ဒီရာသီမှာ ၃၄ ပွဲကစားပြီး ၃၅ ဂိုးမြောက် သွင်းတဲ့ ဂိုးလည်း ဖြစ်ပါတယ်။

ဒုတိယပိုင်းမှာတော့ ၂ သင်းစလုံးဟာ ဘောလုံးပိုင်ဆိုင်ဖို့ ကွင်းလယ်မှာ ပိုမိုကြိုးစားလာပေမယ့် အကြံချင်း တူနေတာကြောင့် ၂ သင်းစလုံး ဘောလုံးကောင်းကောင်း မကိုင်နိုင်ဘဲ ဘောလုံး အပျက်များလာတာကို တွေ့ရပါတယ်။ ရီးယဲလ် အသင်းဟာ အပိုင်သွင်းခွင့်တချို့ ရခဲ့ပေမယ့် မန်ယူဂိုးသမား ဒီဂီယာ လက်စွမ်းပြနေတာကြောင့် ဂိုးမရရှိဘဲ ဖြစ်နေခဲ့ပါတယ်။

မိနစ် ၆၀ နောက်ပိုင်းမှာ ရီးယဲလ် နည်းပြ မော်ရင်ညိုက မော်ဒရစ်၊ ဟီဂူအင်၊ ပီပီတို့ကို ထည့်ကစားစေခဲ့ပေမယ့် အနိုင်ဂိုး မရရှိခဲ့သလို၊ နည်းပြ ဖာဂူဆန်ကလည်း ဂစ်၊ အန်ဒါဆင်၊ ဗလင်စီယာတို့ကို ထည့်သွင်းကစားပြီး ကစားအားကို မချစေဘဲ တိုက်စစ်ဆင် ကစားခဲ့တာကို တွေ့ ရပါတယ်။ ဒီပွဲမှာ မန်ယူအသင်းအတွက် အထူးလက်စွမ်းပြသွားတဲ့ ဒီဂီယာကို နည်းပြဖာဂူဆန်က ချီးကျူးသွားခဲ့ပါတယ်။

ပရိသတ် မျှော်လင့်ထားကြတဲ့ ဗန်ပါစီနဲ့ ရွန်းနီတို့ ဟာ သိပ်ခြေစွမ်း မပြနိုင်ခဲ့ကြဘဲ နောက်တန်းက အီဗန်၊ ဂျုန်းစ်၊ ၀ဲဘ်ဘက်တို့ကို မန်ယူပရိသတ်များက ချီးကျူးပြောဆိုခဲ့ကြပါတယ်။ ရီးယဲလ် – မန်ယူပွဲစဉ်နဲ့ တချိန်တည်းကန်နေတဲ့ တဖက်ပွဲစဉ် ယူကရိန်းကလပ် ရှက်တာဒိုးနက်နဲ့ ဂျာမန်ကလပ် ဘရုရှားဒေါ့မွန် အသင်းတို့ရဲ့ ပွဲစဉ်မှာတော့ တဖက်ကို ၂ ဂိုးစီနဲ့ သရေ ဖြစ်သွားပါတယ်။

ယခုတပတ် ချန်ပီယံလိဂ် ရှုံးထွက်ပွဲစဉ် ရလဒ်များ

ဆဲယ်တစ် ၀ – ၃ ဂျူဗင်တပ်စ်
ဗလင်စီယာ ၁ – ၂ ပီအက်စ်ဂျီ
ရီးယဲလ်မက်ဒရစ် ၁ – ၁ မန်ယူ
ရှက်တာဒိုးနက် ၂ – ၂ ဘရုရှားဒေါ့မွန်


WSJ LIVE VIDEO:

Leave a Reply