ထိုင်းတွင် ညှဉ်းပန်းခံရသူ ကရင်မိန်းကလေးကို မြန်မာအစိုးရ သွားရောက်ကူညီ | ဧရာဝတီ
သတင်း

ထိုင်းတွင် ညှဉ်းပန်းခံရသူ ကရင်မိန်းကလေးကို မြန်မာအစိုးရ သွားရောက်ကူညီ

Hits:7,471
  | |

ထိုင်းနိုင်ငံတွင် ညှဉ်းပန်းခံရသူ ကရင်မိန်းကလေးကို မြန်မာအစိုးရ တာဝန်ရှိသူများက သွားရောက်တွေ့ဆုံကာ ဤသို့ အကူအညီပေးခဲ့သည် (ဓာတ်ပုံ – Hmuu Zaw facebook မှ)

ထိုင်းနိုင်ငံ မြောက်ဘက်ပိုင်း ကန်ဖယ်ဖက် (Kamphaeng Phet) မြို့တွင် ညှဉ်းပန်း နှိပ်စက် ခံခဲ့ရသည့် အသက် ၁၂ နှစ်အရွယ် ကရင် မိန်းကလေးငယ်ကို ကူညီရန် မြန်မာအစိုးရ တာဝန်ရှိသူများက ယနေ့ သွားရောက်တွေ့ဆုံခဲ့ကြောင်း သိရသည်။

ကရင် မိန်းကလေးကို ထိန်းသိမ်းထားသည့် ကန်ဖယ်ဖက် မြို့ရှိ မိခင်နှင့် ကလေး စောင့်ရှောက်ရေးဂေဟာမှ အကြီးအကဲ မစ္စတာ ထန၀ပ် ဆထစ်နှင့် တွေ့ဆုံခဲ့ကြောင်း မြန်မာအစိုးရ အလုပ်သမားဝန် ကြီးဌာနမှ ညွှန်ကြားရေးမှူး ဦးနိုင်ထွန်းက ဧရာဝတီသို့ ပြောသည်။

“အခု စိတ်ပိုင်းဆိုင်ရာ ကျန်းမာရေးကတော့ အမေ၊ အဖေတွေလည်း ရောက်နေပြီး အဖွဲ့အစည်းပေါင်းစုံကလည်း လာကြတယ်၊ နောက် ကျနော်တို့လည်း သွားရောက်ကူညီ တယ်ဆိုတော့ သူတို့လည်း စိတ်အား ထက်သန်ပါတယ်၊ လိုအပ်တဲ့ဟာ အစအဆုံး ကူညီပေးဖို့ ပြောခဲ့တယ်” ဟု ၎င်းက ဆိုသည်။

နိုင်ငံတော် အစိုးရမှ ပေးအပ်လိုက်သည့် ဘတ် ၂ သောင်းနှင့် မြန်မာနိုင်ငံသားများ ထည့်ဝင်မှုဖြင့် ဘန်ကောက်သံရုံးမှ ဖွင့် လှစ် ထားသည့် မြန်မာနိုင်ငံသားများ ကာကွယ်စောင့်ရှောက်ရေး အဖွဲ့ရန်ပုံငွေမှ ဘတ်ငါးထောင်၊ စုစုပေါင်း ဘတ် ၂ သောင်းခွဲ ကိုလည်း ကာယကံရှင်ထံ ပေးအပ်ခဲ့ကြောင်း သိရသည်။

မစ္စတာ ထနဝပ်ဆထစ်၏ ပြောပြချက်အရ ကရင် မိန်းကလေးငယ် အတွက် အလှူငွေ ရရှိရန် ဘဏ်အကောင့်များ ဖွင့်ပေးထားပြီး ကန်ဖယ်ဖက် မြို့ နယ် အုပ်ချုပ်ရေးမှူး အနေဖြင့်လည်း ကလေးငယ်၏ ဖြစ်စဉ်နှင့် ပတ်သက်၍ တိုးတက်မှု အခြေအနေ များကို အစီအရင်ခံစာ တင်ပြရန် ပြောကြားထားကြောင်း ဦးနိုင်ထွန်းက ရှင်းပြသည်။

ထိုင်းအစိုးရ အနေနှင့် ကရင် မိန်းကလေးကို ပုံမှန်ပြန်ဖြစ်သည် အထိ အခမဲ့ ဆေးကုသပေးမည် ဖြစ်ကြောင်းလည်း သိရသည်။
အသက် ၃၅ နှစ် အရွယ် ထိုင်းအမျိုးသားနှင့် အသက် ၃၃ နှစ်အရွယ်ရှိ ထိုင်းမျိုးသမီး လင်မယားက ကရင်အမျိုးသမီး ငယ်ကို အိမ်တွင်း အခိုင်းအစေအဖြစ် ၅ နှစ်ကျော်ကြာ ပိတ်လှောင်ထားပြီး စေခိုင်းသည့် အတိုင်း မလုပ်ပါက ရက်စက်စွာ နှိပ်စက်ခဲ့ကြောင်း၊ ခွေးလှောင်အိမ်အတွင်း ထည့်ထားခြင်း၊ ခန္ဓာကိုယ် အနှံ့ ရေနွေးပူဖြင့် ပက်ခြင်း စသည်ဖြင့် ပြုလုပ်ခဲ့သည်။

ကရင် မိန်းကလေးငယ်က “ရေနွေးပူ အလောင်းခံရပြီး အနာကို ထိုင်း အလုပ်ရှင် လင်မယားက ဆေးမကုပေးဘဲ ကိုယ့် ဘာသာကိုယ် ဆားရည်နဲ့အနာပျောက်အောင် နေအိမ်မှာပဲ ကုသရတယ်” ဟု မကြာသေးခင် ရက်ပိုင်းက ထိုင်းရတ် သတင်းဌာနသို့ ပြောကြားထားသည်။

ကရင် မိန်းကလေးငယ်သည် ဇန်နဝါရီလ ၃၁ ရက်နေ့က ယင်းအိမ်မှ လွတ်မြောက်လာခဲ့ပြီးနောက် မိခင်နှင့်ကလေး စောင့်ရှောက်ရေး ဂေဟာသို့ ပို့ဆောင်ခဲ့ခြင်း ဖြစ်သည်။

တချို့သော ထိုင်းသတင်းများတွင်လည်း ခန္ဓာကိုယ် တခုလုံးတွင် အပူလောင် ဒဏ်ရာ အမာရွတ်များ ပြင်းထန်စွာ ရရှိထားကြောင်း၊ အပူလောင် ဒဏ်ရာကြောင့် အရေပြားများ ပျက်စီးကာ လက်နှစ်ဘက်စလုံး လက်မောင်းရင်းအထိ အရေပြားများ တွဲဆက်သွားကာ မမြှောက်နိုင်သည့် အခြေအနေ ရှိနေကြောင်း ဓာတ်ပုံများဖြင့် ဖော်ပြကာ ရေးသားထားသည်။

ထိုင်းသတင်းများအရ ကရင် မိန်းကလေးငယ်၏ မိဘများသည် ၂၀၀၈ ခုနှစ်က ကန်ဖယ်ဖက် ခရိုင်အတွင်းရှိ ကြံစိုက် လုပ်ငန်းတွင် အလုပ်လုပ်ခဲ့ကြောင်း၊ ကရင် မိန်းကလေးငယ်သည် လွန်ခဲ့သည့် ၃ နှစ်က ထွက်ပြေး လွတ်မြောက်ရန် ကြိုးစားခဲ့ရာ လူတဦးက ရဲလက်သို့အပ်ခဲ့ကြောင်း၊ သို့သော် ရဲက မူလ ထိုင်းလင်မယား အိမ်သို့ ပြန်ပို့ခဲ့ကြောင်း၊ အိမ်ရှင် လင်မယားက အလွန်စိတ်ဆိုးပြီး နံရံနှင့် ခေါင်းကို ဆောင့်ခြင်း၊ ဖိနပ်ဖြင့် မျက်နှာကို ရိုက်ခြင်း၊ ပြစ်ဒဏ်အဖြစ် နားရွက်ဖျားကို ကပ်ကြေးဖြင့် ဖြတ်တောက်ခြင်းများ ပြုလုပ်ခဲ့သည်ဟု သိရသည်။

လတ်တလောတွင် ထိုင်းအလုပ်ရှင် လင်မယားကို အသက်မပြည့်သူအား အဓမ္မ ခိုင်းစေမှု၊ လူကုန်ကူးမှု၊ ညှဉ်းပန်းနှိပ်စက်မှုတို့ အပါအဝင် စွပ်စွဲချက် ၇ ချက်ဖြင့် ဖေဖော်ဝါရီလ ၆ ရက်နေ့က ဝရမ်းထုတ်ကာ ဖမ်းဆီးခဲ့သော်လည်း စွပ်စွဲချက်များကို ငြင်းပယ် ထားပြီး သက်ဆိုင်ရာ ထိုင်းတရားရုံးက ဘတ်ငွေ ၇ သိန်း အာမခံဖြင့် လွှတ်ပေးထားသည်။

အစိုးရ တာဝန်ရှိသူများအနေဖြင့်လည်း ကန်ဖယ်ဖက်မြို့ရှိ အလုပ်သမားရုံးနှင့် ရဲစခန်းတို့ကို သွားရောက်ကာ ယင်းအမှုနှင့် ပတ်သက်၍ ကာယကံရှင် ထိုင်းလင်မယားအား ထိုင်းဥပဒေအရ အရေးယူနိုင်ရန် စီစဉ်ဆောင်ရွက်မှုများကို မေးမြန်းသွားမည် ဖြစ်ကြောင်း သိရသည်။

ထိုထိုင်းလင်မယားတို့ကို လာမည့် အပတ် တနင်္လာနေ့ (ဖေဖော်ဝါရီလ ၁၈ ရက်နေ့) တွင် စွပ်စွဲထားသော ၇ မှုအား စတင် စစ်ဆေးမည် ဖြစ်သည်။

မတရား ညှဉ်းပန်း နှိပ်စက်ခံရသူမှာ ကလေးငယ်ဖြစ်ခြင်း၊ နိုင်ငံခြားသား ဖြစ်ခြင်း စသည့် သိမ်မွေ့ရှုပ်ထွေးသော ကိစ္စများ အမှုတွင် ပါရှိနေကြောင်း၊ ထိုင်းရဲတပ်ဖွဲ့က မျက်မြင်သက်သေများ၊ ထင်ရှားသော အထောက်အထားများ လိုအပ်နေပြီး အကယ်၍ ပြစ်မှု ထင်ရှားပါက ထိုအမှုမျိုးကို အမြင့်ဆုံးအားဖြင့် တသက်တကျွန်းအထိ ပြစ်ဒဏ် ချမှတ်နိုင်ကြောင်း ထိုင်းသတင်းများက ဖော်ပြသည်။


4 Responses

Leave a Reply

  1. May God save all Myanmar .

  2. မြန်မာအစိုးရရဲ့တိုးတက်ပြောင်းလဲလာသော လုပ်ဆောင်ချက်ဖြစ်၍ကြိုဆိုပါသည်။ လက်သည်းဆိပ်တော့ လက်ထိပ်နာဆိုသလို မိမိတိုင်းရင်းသားများအားလုံးရဲ့ဒုက္ခနဲ့အရေးပေါ်အကူအညီလိုအပ်မှုကို အစိုးရသာမက ကျန်နိုင်ငံသားအားလုံးက ညီညီညွတ်ညွတ်ပါဝင်ကူညီနိုင်ကြပါစေ။

  3. မင်းခေါင်

    လူမဆန်မှုကတော့အံ့သြစရာပါပဲ
    ဒီထက်အံ့သြစရာကတော့ Bangkok post လိုသတင်းစာမျိူးမှာ သူတို့နိုင်ငံသိက္ခာကျမှာစိုးလို့
    လားမသိ အရေးပေးဖော်ပြထားခြင်းမတွေ့ရ ရိုဟင်ဂျာကိုကူညီထောက်ပံ့ထားရသောသတင်းမျိူးဆိုလျှင်တော့ BP တို့လက်မနှေးချေ
    ဒါကြောင့် ညီအစ်ကိုမျာ့း့့့  တစ်ပါးတို့၏ မြင့်မြတ်မှုကိုမျှော်ကိုးရန်မသင့်
    သူတပါးနိုင်ငံမှာ နိုင်ငံသားအချင်းချင်းယိုင်းပင်းကြမှတော်ကာကျတော့မည်

  4. I hope she will receive surgical treatment in America or in England. Emotional scars will take time to get healed. Our prayer and thought are with her and with her parents. Her ordeal is beyond imagination.